„Бела вода“ бело

Купажата од Chardonnay и Grenache Blanc, чии заеднички карактеристики се релативно неутралната ароматичност и афинитетот да ја пренесат експресијата од тероарот, на винарот му овозможува доволно простор за одредувањето на стилот на ова вино ставајќи го својот „потпис“. „Бела вода“ бело нуди прекрасен спој на овошни ароми од зелено, коскесто и тропско овошје придружено со нежни тонови на ванила, кокос и влажен кремен. Свежиот и лесен минерален вкус што ова вино го носи во себе е резултат на тероарот, кој надополнет со лесната маслена текстура и совршениот баланс придружен со финесите на винарот, создаваат едно неповторливо искуство.

„Бела вода“ црвено

Во ова впечатливо вино учествуваат две роднински вински сорти Вранец и Плавец, кои како да сакаат да укажат на важноста на роднинските врски и богатството што може да произлезе од нив. Темпераментниот Вранец, како претставник на македонскиот стил на вина придружен со топлината на Медитеранот низ елегантниот Плавец, придонесува за едно вино што има јужен шарм во кој еднакво се рефлектираат и моќта и нежноста. Раскошни ароми на црвено и црно зрнесто овошје придружени со нежните ноти на слатки зачини што го најавуваат крешендото на вкусови – сочни, овошни и свежи – со текстура од прекрасно полирани зрели танини. Хармонија на вкусови во совршен баланс и долг, комплексен пролонгиран вкус што не се заборава.

Лозовите насади се лоцирани во непосредна близина на реките Вардар и Бабуна, предел каде што се мешаат медитеранската и континенталната клима и каде преку целата година е присутен ветар од северен правец, кој го намалува потенцијалот за развој на болести и штетници на виновата лоза. Со сите овие предности, Бабуна им се придружува на Барово, Лепово и Бела Вода, како уште еден уникатен тероар во рамки на „Tikveš Châteaux & Domaines“.

„Бабуна“ бело

Белото вино „Babuna“ е комбинација од сортите албарињо, шардоне и виоње. На мирис се чувствуваат интензивни ноти на цитрусно и коскесто овошје, лимон, како и бела праска, додека на вкус веднаш се открива изразената свежина и вкусовите на цитрусно овошје, зрел лимон, грејпфрут, проследени со ноти на крушка, зелено јаболко и со хармоничен завршеток.

„Бабуна“ црвено

Црвеното вино „Babuna“ е произведено од сортата плавец. Во него доминира мирисот на капина, цреша и зготвени модри сливи, проследен со цветни ноти на љубичица и траги од мирис на јод, што е типична сортна карактеристика. Ова суво вино има освежителна киселост, деликатни танини, полно тело и одлично интегриран алкохол. Виното има хармоничен вкус на сок од калинка, вишна и малина, и сочен финиш. Одличната структура овозможува стареење во шише до 5 години.

Дворецот Château de Gourdon е обиколен со живописни лозови насади што се протегаат на 50 хектари, распослани низ нежните падини на апелациите (законски дефинираните и заштитени области) Côtes du Rhône и Côtes du Rhône Village на самата граница од светски познатиот вински подрегион Châteauneuf-du-Pape или „Новиот дворец на Папата“, чие име го добива додека Авињон бил престолнина на Папата Клемент Петти во четиринаесеттиот век.

Château de Gourdon има фасцинантна историја што е мошне значајна за прекрасното гратче Болен на чија периферија е сместен овој посед. Во 1793 година поседот бил летна резиденција на кардиналот Де ла Фар, додека, пак, лозовите насади се посадени неполн век подоцна во 1870 година.

Тероар – Силното влијание на медитеранската клима овозможува полна зрелост на грозјето, а лесното ветре од север по должината на течението на реката Рона ја намалува температурата во вечерните летни часови, па на тој начин се обезбедуваат доволно природни киселини, кои, пак, на вината им даваат свежина и одличен баланс. Водечка сорта кај црвените вина е Grenache Red што најчесто се купажира со Syrah и со Carignan, додека, пак, од белите вински сорти водечки се Grenache Blanc и Viognier. Основа за розе вината е медитеранската сорта Cinsault во купажа со Grenache Gris. Песокливата сиромашна почва на вината им дава интензивна овошност, додека, пак, силикатните и варовничките компоненти влијаат врз зрачењето во овошната зона на лозата и врз продлабочениот коренов систем кон зоната, со нутриенти и минерали што на вината им даваат збогатено ниво на полифеноли и одредена минералност.

За капацитетите – Поседот Château de Gourdon се наоѓа на најсеверниот дел од Јужна Рона, па бидејќи климата е поладна, тоа придонесува за поголема свежина и подобра ароматичност на вината. Карактеристиките на земјата, песокта, чокотите стари над 40 години (Vieilles Vignes), како и меките танини се предност на нашите елегантни вина од парцелите La Marron, La Vernes, Lade Ganess и други…

Имотот на Château de Gourdon се протега на 50 хектари, а најголемиот дел од лозјето е од сортите гренаш и сира. Лозарството отсекогаш се водело од принципите за најголема почит кон природата и кон лозовите насади. До денес, многу од парцелите имаат стари лози, кои создаваат висококвалитетни вина што може да се вкусат во визбите на шато-винарницата.

Château de Gourdon има и две прекрасни церемонијални сали и покриена тераса, кои претставуваат привлечен простор за организирање свечени приеми, состаноци или, пак, семинари. Терасата нуди прекрасен поглед кон паркот каде што исто така може да се организираат различни видови настани. Стариот базен е совршен за организирање вечерни забави и свечени коктели. Шатото има капацитет до 150 лица, додека, пак, паркот има капацитет до 500 и повеќе лица.

Шато-винарницата има три апартмани што се распоредени во дворецот, како и во придружните згради, каде што може да се сместат од 4 до 10 луѓе за подолг или за пократок престој во текот на целата година. Во периодот од мај до септември во функција е и базенот на отворено, кој совршено ја надополнува можноста да уживате во мирен одмор поминат на лозје. Château de Gourdon се наоѓа на одлична локација, која е крстопат помеѓу Vaucluse, la Drôme Provençale, Le Gard и l’Ardèche.