Регионалната непрофитна иницијатива која ги обединува жените на високи раководни позиции од регионот Адрија (Women on Boards Adria – WOBA) ја прогласи генералната директорка на Винарската визба „Тиквеш“ Бранка Славеска, за свој амбасадор.

Целта на оваа иницијатива е зголемување на родовиот диверзитет во раководството на компаниите и институциите и унапредување на родовата еднаквост во различните нивоа на одлучување.

Благодарение на своето 25-годишното меѓународно искуство на раководни позиции во индустрии што традиционално се доминирани од мажите, со нејзиното вклучување во иницијативата WOBA, Бранка Славеска ќе даде голем придонес за визијата и мисијата на асоцијацијата.

„Заедничката соработката за зајакнување на жените и на нивната самодоверба, со цел да ги развиваат своите таленти и да градат кариера во посакуваната област, е од големо значење. Родовата еднаквост отвора поинакви перспективи, ги поттикнува иновациите и одржливиот развој, делувајќи како катализатор на напредокот во општеството“, истакна Бранка Славеска.

Учеството во иницијативата е можност да се инспирираат многу други жени да го следат нејзиниот пример за остварување на својот потенцијал во корпоративниот свет и ќе придонесе за поттик на родовата еднаквост во сите сфери на општеството.